प्रथम सनेह दुहुँनि मन जान्यौ -सूरदास

सूरसागर

दशम स्कन्ध

राग धनाश्री प्रथम सनेह दुहुँनि मन जान्यौ। नैन-नैन कीन्ही सब बातै, गुप्त प्रीति प्रगटान्यौ।। खेलन कबहुँ हमारैं आवहु, नंद-सदन, ब्रज गाउँ। द्वारैं आइ टेरि मोहिं लीजौ, कान्ह हमारौ नाउँ।। जो कहियै घर दूरि तुम्हारौ, बोलत सुनियै टेरि। तुमहिं सौंह वृषभानु बबा की, प्रात-साँझ इक फेरि।। सूधी निपट देखियत तुम कौं, तातैं करियत साथ। सूर स्याम नागर, उत नागरि राधा, दोउ मिलि गाथ।।674।।