प्रगट भए ब्रज त्रिभुवन राइ -सूरदास

सूरसागर

दशम स्कन्ध

राग सारंग प्रगट भए ब्रज त्रिभुवन राइ। जुग-गुन बीति त्रिगुन-बुधि ब्यापी, सरन चल्यौ सुरपति अकुलाइ। सपनैं कौ धन जागि परै ज्यौं, त्यौं, जानी अपनी ठकुराइ। कहत चल्यौ यह कहा कियौ मैं, जगत-पिता सौं करी ढिठाइ। सिव-विरंचि, रवि-चंद्र, बरुन-जम, लिए अमर-गन संग लिवाइ। बार-बार सिर धुनत जात मग, कैहौं कहा बदन दिखराइ। वे हैं परम कृपालु महा प्रभु रहौं सीस चरननि तर नाइ। सूरदास प्रभु पिता मातु मैं, ओछी बुद्धि करी लरिकाइ।।975।।