पंथी इतनी कहियौ बात -सूरदास

सूरसागर

दशम स्कन्ध

राग सारंग पथी इतनी कहियौ बात । तुम बिनु इहाँ कुँवर वर मेरे, होत जिते उतपात ।। बकी अघासुर टरत न टारे, बालक बनहिं न जात । ब्रज पिजरी रुधि मानौ राखे, निकसन कौ अकुलात ।। गोपी गाइ सकल लघु दीरघ, पीत वरन कृस गात । परम अनाथ देखियत तुम बिनु, केहिं अवलंबै तात ।। कान्ह कान्ह कै टेरत तब धौ, अब कैसै जिय मानत । यह व्यवहार आजु लौ है ब्रज, कपट नाट छल ठानत ।। दसहूँ दिसि तै उदित होत है, दावानल के कोट । आँखिनि मूँदि रहत सनमुख ह्वै, नामकवच दै ओट ।। ए सब पुष्ट हते हरि जेते, भए एकही पेट । सत्वर ‘सूर’ सहाइ करौ अब, समुझि पुरतान हेट ।। 3171 ।।