निसि काहैं बन कौं उठि धाई -सूरदास

सूरसागर

दशम स्कन्ध

राग बिहागरौ निसि काहैं बन कौं उठि धाई।। हँसि-हँसि स्याम कहत हैं सुंदरी, की तुम ब्रज-मारगहि भुलाई।। गई रहीं दधि बेचन मथुरा, तहाँ आजु अवसेर लगाई।। अति भ्रम भयौ बिपिन क्यौं आईं, मारग वह कहि सबनि बताई।। जाहु-जाहु घर तुरत जुवति जन, खीझत गुरुजन कहि डरवाई।। की गोकुल तैं गमन कियौ तुम, इनि बातनि है नहीं भलाई।। यह सुनि कै ब्रज-बाम कहत भई, कहा करत गिरिधर चतुराई।। सूर नाम लै लै जन-जन के मुरली बारंबार बजाई।।1011।।