निरखि ब्रज-नारि छबि स्याम लाजै -सूरदास

सूरसागर

दशम स्कन्ध

राग गुंड मलार निरखि ब्रज-नारि छबि स्याम लाजै। विविध बेनी रची, माँग-पाटी सुभग, भाल बेंदी-बिंदु इंदु लाजै।। स्रवन-ताटक, लोचन, चारु, नासिका, हंस-खंजन-कोर, कोटि लाजै। अधर बिद्रुम, दसननहिं छबि दामि‍नी, सुभग बेगरि निरखि काम लाजै।। चिबुक-तर कंठ श्रीमाल मोतोनि छबि कुच उँचनि हेम गिरि अतिहिं लाजै। सूर की स्वामिनी, नारि ब्रज-भामिनी, निरखि प्रिय, प्रेम सोभा सुलाजै।।1042।।