देखि री नंद-नंदन-ओर -सूरदास

सूरसागर

दशम स्कन्ध

राग केदारौ देखि री नंद-नंदन-ओर। त्रास तैं तन त्रसित भए हरि, तकत आनन तोर। बार बार डरात तोकौं, बदन बदनहिं थोर। मुकुर-मुख, दोउ नैन ढारत, छनहिं छन छबि-छोर। सजल चपल कनीनिका पल अरुन ऐसैं डोर ( ल )। रस भरे अंबुजनि भीतर भ्रमत मानौं भौंर। लकुट कैं डर देखि जैसे भए स्रोनित ओर। लाइ उरहिं, बहाइ रिस जिय, तजहु प्रकृति निहोर। सूर स्‍याम त्रिलोक की निधि, भलैंहि माखन-चोर।।364।।