दीन जन क्‍यौं करि आवै सरन -सूरदास

सूरसागर

प्रथम स्कन्ध

राग धनाश्री              दीन जन क्‍यौं करि आवै सरन। भूल्‍यौ फिरत सकल जल-थल-मग, सुनहु ताप-त्रय-हरन। परम अनाथ, विवेक-नैन बिनु, निगम-ऐन क्‍यौं पावै? पग पग परत कर्म-तम-कूपहिं, को करि कृपा बचावै? नहिं करि लकुटि सुमति-सतसंगति, जिहिं अधार अनुसरई। प्रबल अपार मोह-निधि दस-दिसि, सु धौ कहा अब करई। अखुटित रटत सभीत, ससंकित, सुकृत सब्‍द नहिं पावै। सूर स्‍याम-पद-नख-प्रकास विनु, क्‍यों करि तिमिर नसावै।।48।।