ठाढ़े देखत हैं ब्रजवासी -सूरदास

सूरसागर

दशम स्कन्ध

राग सोरठ ठाढ़े देखत हैं ब्रजवासी। कर जोरे अहि-नारि बिनय करि कहति, धन्य अबिनासी। जे पद-कमल रमा उर राखित, परसि सुरसरी आई। जे पद-कमल संभु की संपति, फन-प्रति धरे कन्हाई। जे पद परसि सिला उद्धरि गई, पांडव गृह फिरि आए। जे पद-कमल-भजन महिमा तैं, जन प्रहलाद बचाए। जे पद ब्रज-जुवतिनि सुखदायक, तिहूँ भुवन धरे बावन। सूर स्याम ते पद फन-फन-प्रति, निरतत अहि कियौ पावन।।568।।