झूलत हरित कुंज पिय-प्यारी -हनुमान प्रसाद पोद्दार

पद रत्नाकर -हनुमान प्रसाद पोद्दार

श्रीराधा माधव लीला माधुरी

राग सोरठ मलार - ताल धमार झूलत हरित कुंज पिय-प्यारी। हरित हिंडोरे, हरित डार में, हरित डोर डारे हरि‌आरी॥ पावस ऋतु तरु-लता हरित सब, हरित भूमि-तृण-छबि अनियारी। हरित बसन, आभरन हरित सब, आसन हरित, हँसनि हियहारी। हरित सखी दो‌उ ओर झुलावत, हरित हिये हर्षित अतिभारी। हरित राग गावत मलार सखि, हरि-हरि मनहारिनि सुखकारी॥ पीत-स्याम मिलि भयौ हरित रँग रूप मदन-कोटिन-मदहारी। खग-मृग हरित निहारत प्रमुदित मधुर स्याम-स्यामा सुकुमारी॥