झगरिनि तैं हौं बहुत खिझाई -सूरदास

सूरसागर

दशम स्कन्ध

राग देवगांधार झगरिनि तैं हौं बहुत खिझाई। कंचन-हार दिऐं नहिं मानति, तुहीं अनोखी दाई। बेगिहिं नार छेदि बालक कौ, जाति बयारि भराई। सत संजम तीरथ-व्रत कीन्हैं, तब यह संपति पाई। मेरौ चीत्यौ भयौ नँदरानी, नंद-भुवन सुखदाई। दीजै बिदा, जाउँ घर अपनैं, काल्हि साँझ की आई। इतनी सुनत मगन ह्वै रानी बोलि लए नँदराई। सूरदास कंचन कै अभरन लै झगरिनि पहिराई॥16॥