जबहिं बन मुरली स्रवन परी -सूरदास

सूरसागर

दशम स्कन्ध

राग जैतश्री जबहिं बन मुरली स्रवन परी। चक्रित भई गोपकन्या सब, काम धाम बिसरी।। कुल मर्जादा वेद की आज्ञा, नैकुहूँ नहीं डरीं।। स्याम-सिंधु, सरिता-ललना गन, जल की ढरनि ढरीं।। अंग-मरदन करिबे कौं लागीं, उबटन तेल धरी।। जो जिहिं भाँति चली सो तैसेहिं, निसि बन कौं जु खरी।। सुत-पति-नेह, भवन-जन-संका, लज्जा नाहिं करी।। सूरदास-प्रभु मन हरि लीन्हौ, नागर नवल हरी।।1000।।