जबहिं स्याम तन अति बिस्तारयौ -सूरदास

सूरसागर

दशम स्कन्ध

राग कान्हौ जबहिं स्याम तन अति बिस्तारयौ। पटपटात टूटत अंग जान्यौ, सरन-सरन सु पुकारयौ। यह बानी सुनतहिं करुनामय, तुरत गए सकुचाइ। यहै बचन सुनि द्रपद-सुता-मुख, दीन्हौ बसन बढ़ाइ। यहै बचन गजराज सुनायौ, गरुड़ छाँड़ि तहँ धाए। यहै बचन सुनि लाखा गृह मैं पांडव जरत बचाए। यह बानी सहि जात न प्रभु सौं, ऐसे परम कृपाल। सूरदास प्रभु अंग सकोरयौ, ब्याकुल देख्यौ ब्याल।।556।।