चलत देखि जसुमति सुख पावै -सूरदास

सूरसागर

दशम स्कन्ध

राग धनाश्री चलत देखि जसुमति सुख पावै। ठुमुकि-ठुमुकि पग धरनी रेंगत, जननी देखि दिखावै। देहरि लौं चलि जात, बहुरि फिरि-फिरि इतहीं कौं आवै। गिरि-गिरि परत, बनत नहिं नाँधत सुर-मुनि सोच करावै। कोटि ब्रह्मांड करत छिन भीतर, हरत बिलंब न लावै। ताकौं लिए नंद की रानी, नाना खेल खिलावै। तब जसुमति कर टेकि स्याम कौ, क्रम-क्रम करि उतरावै। सूरदास प्रभु देखि-देखि, सुर-नर-मुनि-बु‍द्धि भुलावै।।126।।