किसोरी देखत नैन सिरात -सूरदास

सूरसागर

दशम स्कन्ध

राग गूजरी किसोरी देखत नैन सिरात। बलि बलि सुखद मुखारविंद की, चंद्र-बिंब दुरि जात।। अध-मोचन लोचन रतनारे, फूले ज्यौं जलजात। राजत निकट निपट स्रवननि कैं, पिसुन कहत मन-बात।। गौर ललाट-पाट पर सोभित, कुंचित कच अरुझात। मानो कनक-कमल-मकरंदहिं, पीवत अलि न अघात।। नकवेसरि बंसी कै संभ्रम, नैन मीन अकुलात। अरु ताटं‍क कमठ घूंघट उर, जाल बाझि अफनात।। स्याम कंचुकी तामैं सोभित, कंचन कलस न मात। मानहु मत्त गयंद कुंभनि पर, नील धुजा फहरात।। नख सिख लौं रस रूप किसोरी बिलसत साँवल-गात। यह सुख देखत सूर और सूख, उडे़ पुराने पात।।1206।।