उठे नंद-लाल सुनत जननी -सूरदास

सूरसागर

दशम स्कन्ध

राग ललित                                  उठे नंद-लाल सुनत जननी मुख बानी। आलस भरे नैन, सकल सोभा की खानी। गोपी जन विथकित ह्वै चितवति सब ठाढ़ी। नैन करि चकोर, चंद-बदन प्रीति बाढ़ी। माता जल भारी लै, कमल-मुख पखारयौ। नैन नीर परस करत आलसहिं बिसारयौ। सखा द्वार ठाढ़े सब, टेरत हैं बन कौं। जमुना-तट चलौ कान्‍ह, चारन गोधन कौं। सखा सहित जेंवहु, मैं भोजन कछु कीन्‍हौं। सूर स्‍याम हलधर सँग सखा बोलि लीन्‍हौ।।441।।