आदि सनातन हरि अविनासी -सूरदास

सूरसागर

दशम स्कन्ध

राग गौड़ मलार आदि सनातन, हरि, अविनासी। सदा निरंतर घट-घट-वासी। पूरन ब्रह्म, पुरान बखानैं। चतुरानन, सिव, अंत न जानैं। गुन-गन अगम, निगम नहिं पावै। ताहि जसोदा गोद खिलावै। एक निरंतर ध्यावै ज्ञानी। पुरुष पुरातन सो निर्वानी। जप-तप-संजम-ध्यान न आवै। सोइ नंद कैं आँगन धावै। लोचन-स्नवन न रसना-नासा। विनु पद-पानि करै परगासा। बिस्वंंभर निज नाम कहावै। घर-घर गोरस सोइ चुरावै। सुक-सारद से करत विचारा। नारद से पावहिं नहिं पारा। अवरन, बरन सुरति नहिं धारै। गोपिनि के सो बदन निहारै। जरा-मरन तैं रहित, अमाया। मातु पिता सुत, वंधु न जाया। ज्ञान-रूप हिरदै मैं बोलै। सो बछरनि के पाछै डोलै। जल, धर, अनिल, अनल, नभ छाया। पंचतत्त्व तैं जग उपजाया। माया प्रगटि सकल जग मोहै। कारन करन करै सो सौहै। सिव-समाधि जिहि अंत न पावै। सोइ गोप की गाइ चरावै। अच्युत रहै सदा जल-साई। परमानंद परम सुखदाई। लोक रचै राखै अरु मारै। सो ग्वालनि सँग लीला धारै। काल डरै जाकैं डर भारी। सो ऊखल बाँध्यौ महतारी। गुन अतीत, अविगत, न जनावै। जस अपार, स्त्रुति पार न पावै। जाकी महिमा कहत न आवै। सो गोपिनि सँग रास रमावै। जाकी माया लखै न कोई। निर्गुन-सगुन घरै बपु सोई। चौहद भुवन पलक मैं टारै। सो बन बीथिनि कुटी सँवारै। चरन-कमल नित रमा पलोवै। चाहति नैंकु नैन भरि जोवै। अगम, अगोचर, लीला-धारी। सो राधा-बस कुंज-विहारी। बड़भागी वै सब ब्रजवासी। जिनकैं सँग खेलैं अबिनासी। जा रस ब्रह्मादिक नहिं पावैं। सो रस गोकुल-गलिनि बहावैं। सूर सुजस कहि कहा बखानै। गोबिंद की गति गोबिंद जानै॥3॥