आजु बन कोऊ वै जनि जाइ -सूरदास

सूरसागर

दशम स्कन्ध

राग बिलावल आजु बन कोऊ वै जनि जाइ। सब गाइनि-बछरनि समेत, लै आनहु चित्र बनाइ। ढोटा है रे भयौ महर कैं, कहत सुनाइ-सुनाइ। सबहि घोष मैं भयौ कुलाहल, आनँद उर न समाइ। कत हौ गहर करत बिन काजैं, वेगि चलौ उठि धाइ। अपने-अपने मन कौ चीत्यौ, नैननि देख्यौ आइ। एक फिर दधि दूब धरत सिर, एक रहत गहि पाइ। एक परस्पर देत बधाई, एक उठत हँसि गाइ। बालक-वृद्ध-तरुन-नर-नारिनि, बढ़यौ चौगुनौ चाइ। सूरदास सब प्रेम-मगन भए, गनत न राजा-राइ॥20॥