आजु कान्ह करिहैं अनप्रासन -सूरदास

सूरसागर

दशम स्कन्ध

राग सारंग आजु कान्ह करिहैं अनप्रासन। मनि-कंचन के थार भराए, भाँति-भाँति के बासन। नंद-घरनि ब्रज-वधू बुलाई, जे सब अपनी पाँति। कोउ ज्यौनार करति, कोउ घृत-पक, षटरस के बहु भाँति। बहुत प्रकार किए सब व्यंजन, अमित करन मिष्ठान। अति उज्ज्वल-कोमल-सुठि-सुंदर, देखि महरि मन मान। जसुमति नंदहिं बोलि कह्यौ तब, महर, बुलावहु जाति। आपु गए नँद सकल-महर-घर लै आए सब ज्ञाति। आदर करि बैठाइ सबनि कौं, भीतर गए नंदराइ। जसुमति उबटि न्हवाइ कान्ही कौं, पट-भूषन पहिराइ। तन झंगुली, सिर लाल चौतनी, चूरा दुहुँ कर-पाइ। बार-बार मुख निरखि जसोदा, पुनि-पुनि लेति बलाइ। घरी जानि सुत-मुख-जुठरावन नँद बैठे लै गोद। महर बोलि बैठारि मंडली, आनँद करत बिनोद। कनक-थार भरि खीर धरी लै, तापर घृत-मधु नाइ। नँद लै-लै हरि मुख जुठरावत, नारि उठीं सब गाइ। षटरस के परकार जहाँ लगि, लै लै अधर छुवावत। बिस्वंभर जगदीस जगत-गुरु परसत मुख करुवावत। तनक-तनक जल अधर पोंछि कै जसुमति पै पहुँचाए। हरषवंत जुवती सब लै-लै, मुख चूमतिं उर लाए। महर गोप सबही मिलि बैठे, पनवारे परसाए। भोजन करत अधिक रुचि उपजी, जो जाकैं मन भाए। इहिं बिधि सुख बिलसत ब्रजबासी, धनि गोकुल नर-नारी। नंद-सुवन को या छबि ऊपर, सूरदास बलिहारी।।89।।