आजु अति राधा नारि बनी -सूरदास

सूरसागर

दशम स्कन्ध

राग कान्हरौ आजु अति राधा नारि बनी। प्रति प्रति अंग अनंग जोति, रसबस त्रैलोक्य धनी।। सोभित केस बिचित्र भाँति दुति सिषि-सिषंड-हरनी। रची माँग सम भाग रागनिधि, काम-धाम सरनी।। अलक तिलक राजत अकलकित, मृग-मद-अंक बनी। खुभिनि जराव-फूल-दुति यौ, मनु द्वै ध्रुवगति रजनी।। भौंह कमान समान बान मनु, है जुग नैन अनी। नासा तिल प्रसून, बिबाधर, अमल-कमल-बदनी।। चिबुक मध्य मेचक रुचि राजत, बिंदु कुंद रदनी। कंबु-कंठ-बिधि लोक बिलोकत, सुंदरि एक गनी।। बाहु मृनाल, लाल कर पल्लव, मद-गज-गति-गवनी। पति-मन-मनि-कंचन-संपुट-कुच, रोमराजि तटनी।। नाभि भँवर, त्रिबली-तरंग-गति पुलिन-तुलिन-टटनी। कृस कटि, पृथु नितंब, किंकिनि जुत, कदली-खंभ-जघनी।। रचि आभरन सिंगार, अंग सजि, ज्यौ रतिपति सजनी। जीते 'सूर' स्याम गुन कारन, मुख न मुरयौ लजनी।।2184।।