अब कैं नाथ मोहिं उधारि -सूरदास

सूरसागर

प्रथम स्कन्ध

राग केदारौ अब कैं नाथ, मोहिं उधारि। मगन हौं भव-अंबुनिधि मैं, कृपासिंधु मुरारि। नीर अति गंभीर माया, लोभ-लहरि तरंग। लिए जात अगाध जल कौं गहे ग्राह अनंग। मीन इंद्री तनहिं काटत, मोट अघ सिर भार। पग न इत उत धरन पावत, उरझि मोह सिवार। क्रोध-दंभ-गुमान-तृष्‍ना पवन अति झकझोर। नाहिं चितवन देत सुत-तिय, नाम-नौका ओर। थक्‍यौ बीच, बिहाल, बिहवल, सुनौ करुना-मूल। स्‍याम भुज गहि काढ़ि लीजै सूर-ब्रज कैं कूल।।99।।