अद्भुत राम नाम कै अंक -सूरदास

सूरसागर

प्रथम स्कन्ध

नाम-महिमा राग बिलावल अद्भुत राम नाम कै अंक। धर्म-अँकुर के पावन द्वैं दल, मुक्ति बधू-ताटंक। मुनि-मन-हंस-पच्‍छ–जुग जाकैं बल उढि ऊरध जात। जनम-मरन-काटन कौं कर्तरि तीछन बहु बिख्‍यात। अंधकार-अज्ञान हरन कौं रबि-ससि जुगल प्रकास। बासर-निसि दोउ करै प्रकासित महा कुमग अनयास। दुहूँ लोक सुखकरन, हरनदुख, वेद-पुराननि साखि। भक्ति ज्ञान के पंथ सूर ये, प्रेम-निरंतर भाखि।।90।।