हरि यह सुनत गए ता वन मैं -सूरदास

सूरसागर

दशम स्कन्ध

राग सारंग जाबवंती और सत्यभामा का विवाह हरि यह सुनत गए ता वन मैं, सो प्रसेन मृत देख्यौ । सिंह खोज बहुरौ तहँ पायौ, सिंह बहुरि मृत पेख्यौ ।। बहुरौ जामवंत पग देख्यौ, तहाँ जाइ जदुराई । द्वादस दिवस अवधि आवन कहि, बिल में पैठे धाई ।। जामवंत दिन बीस चारि लौं, जुद्ध, कियौ तब जान्यौ । हाथ जोरि करि अस्तुति कीन्ही, मैं तुमकौ न पिछान्यौ ।। बिहँसि कह्यौ जादवपति तासौ, मनि कारन मैं आयौ । जाबवती समेत मनि दै पुनि अपनौ दोष छमायौ ।। सँग के लोग अवधि के बीते, कह्यौ नगर मैं जाइ । मातु पिता व्याकुल ह्वै धाए, मग मैं बैठे आइ ।। मनि सत्नाजित कौं प्रभु दीन्ही, रह्यौ सु सीस नवाइ । सतभामा समेत लै आयौ, मनि कौ हरि सिर नाइ ।। और बहुत दायज दीन्हे उन, करि विवाह व्यौहार । भयौ परम आनंद दुहूँ दिसि, मंगलचार अपार ।। मनि ताकी ताकौ फिरि दीन्ही, सुजस जगत मैं छायौ । श्रीगुरु चरन प्रताप चरित यह, ‘सूरदास’ जन गायौ ।। 4190 ।।