हरि जू की बाल-छबि कहौं बरनि -सूरदास

सूरसागर

दशम स्कन्ध

राग नटनारायन हरि जू की बाल-छबि कहौं बरनि। सकल सुख की सींव, कोटि-मनोज-सोभा-हरनि। भुज भुजंग, सरोज नैननि बदन बिधु जित लरनि। रहे बिवरनि, सलिल, नभ, उपमा अपर दुरि डरनि। मंजु मेचक मृदुल तनु, अनुहरत भूषन भरनि। मनहुं सुभग सिंगार-सिसु-तरु, फरयौ अद्भुत फरनि। चलत-पद प्रतिबिंब मनि आँगन घटुरुवनि करनि। जलज-संपुट-सुभग-छबि भरि लेति उर जनु धरनि। पुन्य फल अनुभवति सुतहिं बिलोकि कै नंद-घरनि। सूर प्रभु की उर बसी किलकनि ललित लरखरनि।।109।।