हनुमत बल प्रगट भयौ -सूरदास

सूरसागर

नवम स्कन्ध

राग मारू अशोक-वन-भंग   हनुमत बल प्रगट भयौ, आज्ञा जब पाई। जनक-सुता-चरन बंदि, फूल्यौ न समाई। अगनित तरु- फलसुगंध-मृदुल-मिष्ट-खाटे। मनसा करि प्रभुहिं अपिं भोजन करि डाटे। द्रुम गहि उतपाटि लिए, दै-दै किलकारी। दानव बिन प्रान भए, देखि चरित भारी। बिहवल-मति कहन गए, जोरे सब हाथा। बानर वन बिघन कियौं, निसिचर-कुल-नाथा। वह निसंक, अतिहिं ढीठ, विडरै नहिं भाजै। मानौ वन-कदलि-मध्य, उनमत गज गाजै। भानै मठ, कूर, बाइ, सरवर कौ पानी। गौरि-कंत पूजत जहँ नूतन जल जानी। पहुँची तब असुर-सैन साखामृग जान्यौ। मानो जल-जीव समिटि जाल मैं समान्यौ। तरुवर तब इक उपाटि हनुमत कर लीन्यौ। किंकर कर पकरि बान तीनि खंड कीन्यौ। जोजन विस्तार सिला पवन- सुत उपाटी। किंकर करि बान लच्छर अंतरिच्छ काटी। आगर इक लोह जटित, लीन्ही वरिवंड। दुहूँ करनि असुर हयौ, भयौ मांस-पिंड। दुर्धर परहस्तु-संग आइ सैन भारी। पवन-पूत दानव-दल ताड़े दिसिचारी। रोम-रोम हनूमंत लच्छ लच्छ बान। जहाँ-तहाँ दीसत, कपि करत राम-आन। मंत्री-सुत पाँच सहित अछयकुँवर सूर। सैन सहित सबै हते झपटि कै लँगूर। चतुरानन-बल सँभारि मेघनाद आयौ। मानौ धन पावस मैं नगपति हे छायौ। देख्यौ जब दिव्य बान निसिचर कर तान्यौ। छाँड़यौ तब सूर हनू ब्रह्म–तेज मान्यौ॥96॥