स्याम तुम्हारी मदन-मुरलिका -सूरदास

सूरसागर

दशम स्कन्ध

राग मलार स्याम तुम्हारी मदन-मुरलिका, नैंसुक सो जग मोह्यौ। जेते जीव जंतु जल थल के, नाद स्वाद सब पोह्यौ। जे तप व्रत किए तरनि-सुता-तट, पन गहि पीठि न दीन्ही। ता तीरथ-तप के फल लैकै, स्याम सोहागिनि कीन्ही। धरनि धरी, गोबर्धन राख्यौ, कोमल पानि-अधार। अब हरि लटकि रहत टेढ़े ह्वै, तनक मुरलि कै भार। धन्य सुघरी सील कुल छाँड़े, राँची वा अनुराग। अब हरि सींचि सुधा-रस, मेटत तन के पहिले दाग। निदरि हमैं अवरनि रस पीवति, पढ़ी दूतिका भाइ। सूरदास कुंजनि तैं प्रगटी, चोरि सौति भई आइ।।656।।