उनसौं हमरौ कछु न बसायौ। तातैं तुमकौ आनि सुनायौ।
औरौ दँड-दाता कोउ आहि। हमसौ कयौं न बतावौ ताहि?
धर्मराज करि हरि कौ ध्यान। निज दूतनि सौं कह्यौ बखान।
नारायन सबके करतार। पालन अरू पुनि करत संहार।
ता सम दुतिया और न कोइ। जो चाहै सो साजै सोइ।
ताकौ तन जब नाम उचारयौ। तब हरि-दूतनि तुम्हैं निवारयौ।
हरि के दूत जहाँ- तहाँ रहै। हम तुम उनकी सोध न लहैं।
जो-जो मुख हरि-नाम उचारैं। हरि -गन तिहिं-तिहिं तुरत उधारैं।
नाम महातम तुम नहिं जानौ। नाम-महातम सुनौ, बखानौं।
ज्यौं त्यौं कोउ हरि-नाम उच्चरै। निस्चय करि सो तरै पै तरै।
जाके गृह मैं हरि-जन जाइ। नाम कीरतन करै सौ गाइ।
जद्यपि वह हरि-नाम न लेइ। तद्यपि हरि तिहिं निज-पद देइ।
कैसौहू पापी किन होइ। राम-नाम मुख उचरै सोइ।
तुम्हरौ नहीं तहाँ अधिकार। मैं तुमसौं यह कहौं पुकार।
अजामील हरि-दूतनि देखि। मन मैं कीन्हौ हर्ष विसेषि।
जम-दूतनि कौं इतहिं निवारयौ। वा भय तैं मोहिं इनहिं उबारयौ।
तब मन माहिं आनि बैराग। पुत्र -कलत्र- मोह सब त्याग।
हरि-पद सौं उन ध्यान लगायौ। तातकाल बैकुंठ सिधायौ।
अंतकाल जो नाम उचारै। सो सब अपने पापनि जारै।
ज्ञान-विराग तुरत तिहिं होइ। सूर बिष्नु-पद पावै सोइ।।4।।
