सुनत तिहारी बातैं मोहन -सूरदास

सूरसागर

दशम स्कन्ध

राग नट सुनत तिहारी बातैं मोहन च्वै चले दोऊ नैन। छुटि गई लोक-लाज आतुर ह्वै, रहि न सकत चित-चैन।। उर काँप्यौ, तन पुलक पसीज्यौ, बिसरि गए मुख-बैन। ठाढ़ी ही जैसे तैसैं झुकि, परी धरनि तिहि ऐन।। कोउ सित, कोऊ कमल, कुंकुमा, कोउ धाई जल लैन। ताहि कछू उपचार न लागत, डसी कठिन अहि-मैन।। हौं पठई इक सखी सयानी, अनबोली दै सैन। सूर स्याम राधिका मिलैं बिनु, कहा लगे दुख दैन।।749।।