रैनि जागि प्रीतिम कैं संग रंग भीनी -सूरदास

सूरसागर

दशम स्कन्ध

राग भैरव रैनि जागि प्रीतिम कैं संग रंग भीनी। प्रफुलित मुख-कंज, नैन-खंजरीट-मीन-मैन बिथुरि रहे चुरनि कच बदन ओप दीनी।। नर आलस जँभाति, पुलकित अति पान खाति, मदमाती तन-सुधि नहिं सिथिलित भई बेनी। माँग तैं मुकुतावलि टरि, अलक संग अरुझि रही, उरगिनि सतफन मानौ कंचुलि तजि दीनी।। बिकसत ज्यौं चंप-कली भोर भऐं भवन चली लटपटात प्रेम घटा गज-गति गति लीन्ही। आरित कौ करत नास, गिरिधर सुठि सुख की रासि, सूरदास-स्वामिनि-गुन-गन न जात चीन्ही।।1694।।