रुकमिनि देवी मंदिर आई -सूरदास

सूरसागर

दशम स्कन्ध

राग आसावरी रुकमिनि देवी मंदिर आई । धूप दीप पूजा सामग्री, अली संग सब ल्याई ।। रखवारी कौ बहुत महाभट, दीन्हे रुकम पठाई । ते सब सावधान भए चहुँ दिसि, पंछी तहाँ न जाई ।। कुँवरि पूजि गौरी विनती करी, बर देउ जादवराई । मैं पूजा कीन्हो इहिं कारन, गौरी सुनि मुसकाई ।। पाइ प्रसाद अंबिका मंदिर, रुकुमिनि बाहर आई । सुभट देखि सुंदरता मोहे, धरनि गिरे मुरझाई ।। इहिं अंतर जादौपति आए, रुकमिनि रथ बैठाई । ‘सूरज’ प्रभु पहुँचे दल अपनै, तब सुभटनि सुधि पाई ।। 4181 ।।