रच्यौ रास रंग स्याम -सूरदास

सूरसागर

दशम स्कन्ध

राग कल्यान रच्यौ रास रंग स्याम सबहिन सुख दीन्हौ। मुरली-सुर करि प्रकास, खग-मृग सुनि रस-उदास, जुवतिनि तजि गेह बास, वनहिं गवन कीन्हौ।। मोहे सुर-असुर-नाग, मुनिजन-गन भए जाग, सिव सारद नारदादि चकित भए ज्ञानी।। अमरवि सह अमर-नारि, आई लोकनि बिसारि, ओक ओक त्यागि, कहतिं धन्य-धन्य बानी।। थकित-गति भयौ समीर, चंद्रमा भयौ अधीर, तारागन लज्जित भए, मारग नहिं पावैं।। उलटि बहति जमुन-धार, विपरित सबही बिचार, सूरज-प्रभु संग नारि, कौतुक उपजावैं।।1154।।