मुरली हरि कौं नाच नचावति -सूरदास

सूरसागर

दशम स्कन्ध

राग रामकली मुरली हरि कौं नाच नचावति। एते पर यह बाँस-बँसुरिया, नंद-नँदन कौं भावति।। ठाढ़े रहत बस्य ऐसे ह्वै, संकुचत बोलत बात। वह निदरे आज्ञा करवावति, नैकुँहुँ नाहिं लजात।। जब जानति आधीन भए हैं, देखति ग्रीव नवावत। पौढ़त अधर, चलित कर-पल्लव रंध्र-चरन पलुटावत।। हम पर रिस करि-करि अवलोकत, नासा-पुट फरकावत। सूर-स्याम जब-जब रीझत हैं, तब-तब सीस डुलावत।।1325।।