बेगि चलौ पिय कुँवर कन्हाई -सूरदास

सूरसागर

दशम स्कन्ध

राग घनाश्री बेगि चलौ पिय कुँवर कन्हाई। जा-कारन तुम यह बन सेयौ, सो तिय मदन-भुअंगम खाई।। नैन सिथिल, सीतल नासा-पुट, अंग तपति कछु सुधि न रहाई। सकसकात तन भीजि पसीना, उलटि पलटि तन तोरि जम्हाई।। अनजानत मूरनि कौं जित-तित, उठि दौरी जिनि जहाँ बताई। ताहि कछू उपचार न लागत, कर मीडैं सहचरि पछिताई।। तुम दरसन इक बार मनोहर, यह औषधि इक सखी लखाई। जौ सूरज प्रभु ज्यायौ चाहत, तो ताकौ अब देहु दिखाई।।748।।