बरसत मेघवर्त्त धरनि पर -सूरदास

सूरसागर

दशम स्कन्ध

बरसत मेघवर्त्त धरनि पर। मूसलधार सलिल बरषतु है, बूँद न आवत भू पर।। चपला चमकि-चमकि चकचौंधति, करति सब्द-आघात। अंधाधुंधु पवनबर्त्तक घन, करत फिरत उतपात।। निसि सम गगन भयौ आच्छादित, बरषि-बरषि झर इंद। ब्रजबासी सुख चैन करत सब, धरे गिरिवर गोबिंद।। मेघ बरषि जल सबै बढ़ाने, दिवि-गुन गए सिराइ। वैसोइ गिरि, वैसे ब्रजबासी, दूनौ हरष बढ़ाइ।। सात दिवस जल बरषि निसा दिन, ब्रज-घर-घर आनंद। सूरदास ब्रज राखि लियौ धरि, गिरिवर कर नँद नंद।।877।।