नातरु सुनि दसकंध निसाचर -सूरदास

सूरसागर

नवम स्कन्ध

राग मारू   मौकौं राम रजायसु नाहीं। नातरु सुनि दसकंध निसाचर, प्रलय करौं छिन माहीं। पलटि घरौं नव खंड पुहुमि तल, जौ बल भुजा सम्हारौं। राखौं मेलि भँडार सूर-ससि, नभ कागद ज्यौं फारौं। जारौं लंक, छेदि दस मस्त-क, सुर-संकोच निवारौं। श्रीरघुनाथ-प्रताप-चरन करि उर तैं भुजा उपारौं। रे रे चपल, बिरूप, ढीठ, तू बोलत वचन अनेरौ। चितवै कहा पानि-पल्लव-पुट, प्रान प्रहारौं तेरौ। केतिक संख जुगै जुग बीते मानव असुर-अहेरौ। तीनि लोक बिख्यात बिसद जस, प्रलय नाम है मेरौ। रे रे अंध बीसहू लोचन, पर-तिय-हरन विकारी। सूने भवन गवन तैं कीन्हौ, सेष-रेख नहिं टारी। अजहूँ कह्यौ सुनै जो मेरौ, आए निकट मुरारी। अनक-सुता तैं चलि, पाइनि परि, श्रीरघुनाथ-पियारी। ‘’संकट परैं जो सरन पुकारौं, तौ छत्री न कहाऊँ। जन्महि तैं तामस आराध्यौ, कैसें हित उपजाऊँ? अब तौ सूर यहै बनि आई, हर कौ निज पद पाऊँ। ये दससीस ईस-निरमालय, कैसैं चरन छुवाऊँ’’?॥132॥