नंद कह्यौ कह मांगौं स्वामी -सूरदास

सूरसागर

दशम स्कन्ध

राग बिलावल नंद कह्यौ कह माँगौं स्वामी। तुम जानत सब अंतरजामी।। अष्ट सिद्ध नवनिधि तुम दीन्हौ। कृपा-सिंधु तुम्हरोई कीन्हौ।। कुसल रहैं बलराम कन्हाई। इनहीं कारन करत पुजाई।। देवनि के मनि गिरिवर तुम हौ। जहँ-तहँ व्यापक पूरन सम हो।। तुम हरता तुम करता धर के। देखि थकित नर-नारि नगर के।। बड़ौ देवता स्याम बतायौ। प्रगट भयौ सब भोजन खायौ।। सूर स्याम कैं जोइ मन आवै। सोइ सोइ नाना रुप बनावै।।915।।