धोखैं ही धोखैं डहकायौ -सूरदास

सूरसागर

प्रथम स्कन्ध

राग कल्‍यान धोखैं ही धोखैं डहकायौ। समुझि न परी, बिषय-रस गीध्‍यौ, हरि-हीरा घर माँझ गँवायौ। ज्‍यौं कुरंग जल देखि अवनि कौ, प्‍यास न गई चहूँ दिसि धायौ। जनम-जनम बहु करम किए हैं, तिनमैं आपुन आपु बँधायौ। ज्‍यौं सुक सेमर सेव आस लगि, निसि-बासर हठि चित्त लगायौ। रीतौं पर्यौ जबै फल चाख्‍यौ, उड़ि गयौ तूल, ताँवरौ आयौ। ज्‍यौं कपि डोरि बाँधि बाजीगर, कन-कन कौं चौहटैं नचायौ। सूरदास भगवंत-भजन बिनु, काल-ब्‍याल पै आपु डसायौ।।326।।