दुलहिनि दूलह स्यामा स्याम -सूरदास

सूरसागर

दशम स्कन्ध

राग बिहागरौ दुलहिनि दूलह स्यामा स्याम। कोक-कला-ब्युतपन्न परस्पर, देखत लज्जित काम।। जा फल कौं व्रजनारि कियौ ब्रत, सो फल सबहिनि दीन्हौ। मनकामना भई परिपूरन, सबहिनि मानि जु लीन्हौ।। राग-रागिनी प्रगट दिखायौ, गायौ जो जिहिं रुप। सप्तम सुरनि के भेद बतावति, नागरि रूप-अनूप।। अतिहिं सुघर पिय कौ मन मोहति, अपबस करति रिझावति। सूर स्याम-मोहनि-मूरति कौं, बार-बार उर लावति।।1144।।