दयानिधि तेरी गति लखि न परै -सूरदास

सूरसागर

प्रथम स्कन्ध

राग गौरो दयानिधि तेरी गति लखि न परै। धर्म अधर्म, अधर्म धर्म करि, अकरन करन करै। जय अरु बिजय कर्म कह किन्‍हौ, ब्रह्म-सराप दिवायौ। असुर जोनि ता ऊपर दीन्‍हीं, धर्म उछेद करायौ। पिता बचन खंडै सो पापी, सोइ प्रहलादहिं कीन्‍हौ। निकसे खंभ-बीच तैं नरहरि, ताहि अभय पद दीन्‍हौ। निकसे खंभ-बीच तैं नरहरि, ताहि अभय पद दीन्‍हौ। दान धर्म बहु दियौ भानु-सुत, सो तुव बिमुख कहायौ। बेद-बिरुद्ध सकल पांडव-कुल, सो तुम्‍हरैं मन भायौ। जज्ञ करत बैरोचन कौ सुत, बेद-बिहित-विधि-कर्मा। सो छलि बाँधि पताल पठायौ, कौन कृपानिधि, धर्मा? द्विज-कुल-पतित अजामिल विषयी, गनिका हाथ विकायौ। सुत-हित नाम लियौ नारायन, सो बैकुंठ पठायौ। पतिव्रता जालंधर-जुवती, सो पतिव्रत तैं टारी। दुष्‍ट पुंस्‍चली, अधम सो गनिका सुवा पढ़ावत तारी। मुक्ति-हेत जोगी स्‍त्रम साधै, असुर विरीधै पावै। अविगत गति करुनामय तेरी, सूर कहा कहि गावै।।104।।