थौरे जीवन भयौ तन भारौ -सूरदास

सूरसागर

प्रथम स्कन्ध

राग कान्‍हरौ थौरे जीवन भयौ तन भारौ। कियौ न संत-समागम कबहूँ, लियौ न नाम तुम्‍हारौ। अति उनमत्त-मोह-माया बस, नहिं कछु बात बिचारौ। करत उपाव न पूछत काहू, गनत न खाटौ-खारौ। इंद्री-स्‍वाद-बिबस निसि-बासर, आप अपुनपौ हारौ। जल औंड़े मैं चहुँ दिसि पैरयौ, पाऊँ कुल्‍हारौ मारौ। बाँधी मोट पसारि त्रिबिध गुन, नहिं कहुँ बीच उतारौ। देख्‍यौ सूर बिचार सीस परी, तब तुम सरन पुकारौ।।152।।