तुम तजि और कौन पै जाउँ -सूरदास

सूरसागर

प्रथम स्कन्ध

राग मलार तुम तजि और कौन पै जाउँ ? काकैं द्वार जाइ सिर नाऊँ, पर हथ कहाँ बिकाउँ। ऐसौ को दाता है समरथ, जाके दिऐं अघाउँ। अंत काल तुम्‍हरैं सुमिरन गति, अनंत कहूँ नहिं दाउँ। रंक सुदामा कियौ अजाची, दियौ अभय-पद ठाउँ। कामधेनु, चिंतामनि, दीन्‍हौं कल्‍पवृच्‍छ-तर छाउँ। भव-समुद्र अति देखि भयानक, मन मैं अधिक डराउँ। कीजै कृपा सुमिरि अपनौ प्रन, सूरदास बलि जाउँ।।164।। इस पद के अनुवाद के लिए यहाँ क्लिक करें