जब तैं आँगन खेलत देख्यौ -सूरदास

सूरसागर

दशम स्कन्ध

राग आसावरी जब तैं आँगन खेलत देख्यौ मैं जसुदा कौ पूत री। तब तैं गृह सों, नातौ टूट्यौ, जैसे काँचौ सूत री। अति बिसाल बारिज-दल-लोचन, राजति-काजर रेख री। इच्छा सौं मकरंद लेत मनु अलि गोलक के बेष री। स्रवन सुनत उतकंठ रहत हैं, जब बोलत तुतरात री। उमँगै प्रेम नैन-मग ह्वै कै, कापै रोक्यौ जात री। दमकतिं दोउ दूध की दतियाँ, जगमग जगमग होति री। मानौ सुंदरता-मंदिर मैं रूप-रतन की ज्योति री। सूरदास देखैं सुंदर मुख, आनँद उर न समाइ री। मानौ कुमुद कामना-पूरन पूरन इंदुहिं पाइ री।।136।।