चतुर नारि सब कहतिं बिचारि -सूरदास

सूरसागर

दशम स्कन्ध

राग आसावरी चतुर नारि सब कहतिं बिचारि। रोमावली अनूप बिराजति, जमुना की अनुहारि। उर-कलिंद तैं धँसि जल-धारा, उदर-धरनि परबाह। जाति चली धारा ह्वै अध कौं, नाभी-ह्लद अवगाह। भुजा दंड तट, सुभग घाट घट, बनमाला तरु कूल। मोतिनि-माल दुहूँवा मानौ, फेन लहरि रस-फूल। सूर स्याम-रोमाबलि की छबि, देखत करतिं बिचार। बुद्धि रचतिं तरि सकतिं न सोभा, प्रेम बिबस ब्रजनार।।637।।