गगन मेध घहरात थहरात गाता -सूरदास

सूरसागर

दशम स्कन्ध

राग मलार गगन मेध घहरात थहरात गाता। चपला चमचमाति, चमकि नभ महरात, राखि क्यौं न ब्रज नंद-दाता।। सुनत करुना बैंन, उठे हरि बल-ऐन, नैन को सैन गिरि-तन निहारयौ। सबनि धीरज दियौ, उचकि मंदर लियौ, कह्यौ गिरिराज तुमकौं उबारयौ।। करज कैं अग्र भुज बाम गिरिवर धरयौ, नाम गिरिराज परयौ भक्त काजै। सूर प्रभु कहत ब्रज-बासि-वासिनिनि, राखि तुम लियौ गिरिराज-राजैं।।870।।