खेलन चलौ बाल गोबिंद -सूरदास

सूरसागर

दशम स्कन्ध

राग रामकली खेलन चलौ बाल गोबिंद। सखा प्रिय द्वारै बुलावत, घोष-बालक-बृंद। तृषित हैं सब दरस-कारन, चतुर चातक दास। बरषि छबि नव वारिधर तन, हरहु लोचन-प्यास। बिनय बचननि सुनि कृपानिधि, चले मनहर चाल। ललित लघु-लघु चरन-कर, उर-बाहु-नैन बिसाल। आजिर पद-प्रतिबिंब राजत, चलत उपमा-पुंज। प्रति चरन मनु हेम बसुधा, देति आसन कंज। सूर प्रभु की निरखि सोभा रहे सुर अवलोकि। सरद चंद चकोर मानौ, रहे थकित बिलोकि।।218।।