खेलत स्यामा-स्याम ललित -हनुमान प्रसाद पोद्दार

पद रत्नाकर -हनुमान प्रसाद पोद्दार

श्रीराधा माधव लीला माधुरी

राग काफी - ताल दीपचंदी खेलत स्यामा-स्याम ललित ब्रज में रस-होरी॥ राधा-संग सखी-सहचरि सब मिलि केसर-रँग-घोरी। सुन्दर स्याम-बदन पर डारत भरि-भरि कनक-कटोरी॥ प्रेम-रस-रंग-बिभोरी॥-खेलत०॥ हेरि-हेरि हरि-मुख पिचकारी छाँड़ि रहीं चहुँ ओरी। पकरि हाथ सखियन मलि दीन्हीं मुँह गुलाल अरु रोरी॥ स्याम-मुख अरुन भयौ री॥-खेलत०॥ देखि प्रसन्न वदन सखियन सँग रंगिनि नवल किसोरी। उमग्यौ हिय आनंद-सिंधु, हरि रँग दीन्हीं सब गोरी॥ सुरस-संग्राम मच्यौ री॥-खेलत०॥ बाजत ताल-मृदंग, ढोल-ढप, सिंगा-बेनु ढपोरी। गावत राग धमार नृत्य करि, कर अबीर की झोरी॥ पुकारत हो-हो होरी॥-खेलत०॥