कैसैं पुरी जरी कपिराइ -सूरदास

सूरसागर

नवम स्कन्ध

राग मारू   कैसैं पुरी जरी कपिराइ। बडे़ दैत्य कैसैं कै मारे, अंतर आप बचाइ? प्रगट कपाट विकट दीन्हें हे, बहु जोधा रखवारे। तैंतिस कोटि देव बस कीन्हें , ते तुमसौं क्यौं हारे? तीनि लोक डर जाकैं काँपै, तुम हनुमान न पेखे? तुम्हरैं क्रोध, स्त्राप सीता कैं, दूरि जरत हम देखे। हौं जगदीस, कहा कहौं तुमसौं, तुम बल-तेज मुरारी। सूरदास सुनौ सब संतौ अविगत की गति न्यारी॥105॥