कृष्ण-कृष्ण कहें सब, मोहि अति प्यारौ लगै,
मन गुदगुदी होइ, बोलूँ कृष्ण-नाम री।
’हा कृष्ण! हा प्रिय कृष्ण’ मैं पुकारि उठी बरबस,
बही अश्रुधार, चौंकी सब बाम री॥
भई मैं अचेत, देखि मोहि हँस्यौ परिवार री।
मोहन-मुख-पंकज पै सरबस दीन्हौ वार री॥
’सारी ब्रजनारिन कौं बेभान कहति हुती,
भाभी ! तू भई बेभान क्यों अबार री ?’
’हा हा! बीर ! कहा कहौं, बिंध्यौ आय तीर हिएँ,
तासौं बही प्रेम-रस-सुधा-धार री॥
बेगि मो मिलाय प्रान-प्यारे मन-मोहन सौं,
जनम-जनम भूलूँ नहीं उपकार री।
जाकौ नाम हृदय बेधि, दै बहाय सुधा-धार,
ताकौ बस मिलन सब सार-कौ-सार री’॥
स्याम प्रगट भए तहाँ, बामा के प्यार री।
मोहन-मुख-पंकज पै सरबस दीन्हौ वार री॥
