किहिं बिधि करि कान्हहिं समुझैहौं -सूरदास

सूरसागर

दशम स्कन्ध

राग कान्हरौ किहिं बिधि करि कान्हहिं समुझैहौं? मैं ही भूलि चंद दिखरायौ, ताहि कहत मैं खैहौं। अनहोनी कहुँ भई कन्हैया, देखी-सुनी न बात। यह तौ आहि खिलौना सबकौ, खान कहत तिहिं तात। यहै देत लवनी नित मोकौं, छिन-छिन साँझ-सवारे। बार-बार तुम माखन मांगत, देउँ कहा तैं प्यारे? देखत रहौ खिलौना चंदा, आरि न करौ कन्हाई। सूर स्याम लिए हँसति जसोदा, नंदहि कहति बुझाई।।189।।