करौ, प्रभु! ऐसी कृपा महान -हनुमान प्रसाद पोद्दार

पद रत्नाकर -हनुमान प्रसाद पोद्दार

वंदना एवं प्रार्थना

राग आसावरी - तीन ताल करौ, प्रभु! ऐसी कृपा महान। छाड़ि कपट-छल भजौं निरंतर सरल हृदै तजि मान॥ सत्य, बिरति, बिग्यान, चरन-रति देहु दया करि दान। जीवन अर्पित होय जथारथ, मिटै मोह-‌अग्यान ममता रहै सदा प्रभु-पद महँ, रहै दास-‌अभिमान। निज-पर, लाभ-हानि-सब महँ रह चित की बृत्ति समान॥ सब महँ लखौं निरंतर तुम कौं, करौं सदा सनमान। जीवमात्र कौ करौं न कबहूँ अहित और अपमान॥ राग-द्वेष-रहित इंद्रिय-मन सेवा करैं अमान। परम ’अकिंचन’ सदा रहौं मैं तुमहिं परम धन जान॥