आपु कदम चढ़ि देखत स्याम -सूरदास

सूरसागर

दशम स्कन्ध

राग सूही आपु कदम चढ़ि देखत स्याम। बसन अभूषन सब हरि लीन्हे, बिना बसन जल-भीतर बाम।। मूँदन नैन ध्यान धरि हरि कौ, अंतरजामी लीन्ही जान। बार-बार सबिता सौं माँगति हम पावैं पति स्याम सुजान।। जल तैं निकसि आइ तट देख्यौ, भूषन चीर तहाँ कछु नाहिं। इत-उत देखि चकित भईं सुंदरि, सकुचि गईं फिरि जल ही माहिं।। नाभि प्रजंत नीर मैं ठाढ़ी थर-थर अँग काँपतिं सुकुमारि। को लै गयौ बसन आभूषन, सूर स्याम उर प्रीति बिचारि।।785।।